9. Tannhelse

Litt dårlegare tannhelse hos 12-åringane 

Av landets 66 122 12-åringar hadde 60,9 prosent ikkje hatt hol i tennene ved 12-årskontroll i 2020. I Møre og Romsdal hadde 56,9 prosent av dei 3 278 12-åringane ikkje hatt hol heller, på same tid. Det er tredje lågast blant fylka, der Agder og Vestfold og Telemark ligg lågast, med høvesvis 53,4 og 56,0 prosent. Best tannhelse blant 12-åringane hadde Innlandet, der 68,1 prosent ikkje hadde hatt hol ved 12-årskontroll.  

På landsbasis hadde 80,7 prosent av 12-åringane ikkje ny karieserfaring ved kontrollen. Også her kjem Møre og Romsdal litt dårlegare ut, med 77,7 prosent. Innlandet toppar også denne statistikken, med 84,5 prosent utan ny karieserfaring.  

I Noreg har 57 259 12-åringar motteke behandling eller vore på kontroll dei siste to åra. Det utgjer 86,6 prosent av dei. I Innlandet er det fleire enn dei som er registrert som busett der som har motteke behandling eller vore på kontroll. Møre og Romsdal kjemt nest best ut, med 99,3 prosent.  

Det er store variasjonar i utgiftsbilete til tannhelsesektoren. Samla brukte fylkeskommunane om lag 3,5 milliardar kroner på sektoren i 2020. Det blir i gjennomsnitt 657 kroner per innbyggar i landet. Møre og Romsdal ligg svært nært gjennomsnittet, med 649 kroner per innbyggar.

Dei offentlege tannhelsekontora kan også tilby tenester utover det offentlege tilbodet. Dermed ligg netto driftsutgifter lågare enn bruttokostnadene. Per innbyggar er netto driftsutgifter 503 kroner nasjonalt, medan dei ligg litt høgare i Møre og Romsdal, med 611 kroner.  

I 2020 vart det investert om lag 112 millionar kroner i sektoren, det utgjer 20,8 kroner per innbyggar på landsbasis. Møre og Romsdal låg litt høgare målt per innbyggar med 22,8 kroner og ei samla investering på om lag 6 millionar kroner.