7. Personinntekt

Lågare gjennomsnittsinntekt enn landet

Hovudpostar frå likninga byggar på likningsdata, og er den beste kjelda til å synleggjere inntektsutviklinga i kommunane. I 2021 baserer tala seg på likninga for 2019 og er med det den siste publiseringa med såkalla «gammal» kommuneinndeling, altså inndeling før kommunereforma og ny inndeling frå og med 1.1.2020. Bruttoinntekta er alle lønns-, nærings-, pensjons- og kapitalinntektene ein person har.  

Medianinntekta (midtverdien om ein sorterer alle bruttoinntekter i fylket stigande) var i 2019 406 800 kr, 2,4 prosent lågare enn medianinntekta i landet som var på 416 700 kr. Skodje kommune hadde den høgaste medianinntekta i fylket, med 435 000 kr, medan Halsa hadde den lågaste med 354 200 kr. I tillegg til Skodje hadde Molde, Giske, Ålesund og Ulstein ei medianinntekt som låg over landet.  

Landsgjennomsnittet for begge kjønn samla var 483 300 kr, medan snitt for Møre og Romsdal var 464 700 kr. Sandøy hadde høgast gjennomsnittleg inntekt for begge kjønn, med 519 900 kr. Lågast var Halsa med 406 600 kr.  

Sandøy hadde fylkets høgaste, og landets sjette høgaste, gjennomsnittlege bruttoinntekt for menn. Det er for gjennomsnittsinntekt for menn at det er størst skilnad på kommunane. Gjennomsnittleg bruttoinntekt i Sandøy (686 800 kr) er heile 47,9 prosent høgare enn kva den er i Stordal, som ligg lågast med 464 300 kr.  

Det er berre Molde som ligg over landsgjennomsnittet for bruttoinntekt for kvinner. På landsbasis var den 397 900 kr, mot 405 700 kr i Molde. Skilnaden frå landsgjennomsnittet er ikkje stor, og Molde kjem på ein 40. plass om ein rangerar alle kommunane. Det synleggjer at fylket ligg langt frå landsgjennomsnittet, og skilnaden her er høgare enn for menn. Skilnaden mot det nasjonale gjennomsnittet er 4,0 prosent for begge kjønn, 2,9 for menn og 6,4 for kvinner.